NETWORKING LANTEGIA: enpresaren balio-proposamena eta hori eraginkortasunez helaraztea

Lan-saio praktiko eta berritzailea, Lego Serious Play metodologia aplikatuz

Balizko bezeroengana eraginkortasunez iritsi nahi duten eskualdeko enpresa txikietako ekintzaile, profesional eta sustatzaileentzako lantegia da.

Helburua da enpresa bakoitzak bere negozio, produktu eta zerbitzuen balio-proposamena identifikatzeko eta zehazteko gai izatea, merkataritza-lana erraztuko dioten salmenta-argudio sendo eta konbentzigarriak sortu ahal izateko.

Saioan zehar, enpresek lantegira bertaratu diren gainerako parte-hartzaileekin partekatuko dituzte beren merkataritza-aurkezpenak, networkingaren bitartez. Hala, beren burua ezagutzera emateaz gain, aukerako harremanak, lankidetza-bideak eta gisakoak landuko dituzte, enpresa eta profesional parte-hartzaileen arteko hurbilketa erreal eta zehatzari bide emanez, etorkizunean sinergiak eratu eta baterako ekintzak egin ahal izateko.

Lantegia datorren martxoaren 28an egingo da, 16:00etatik 20:00etara, Reforamurrio Enpresaldean. Bertaratzea doakoa izango da. Jarduketa hau Aiarako Kuadrillaren Ekonomia eta Industria Suspertzeko Planaren barruan kokatzen da; hau da, Arabako Foru Aldundiak eta Kuadrillako udalek diruz lagundutako Planaren barruan.

Argibide gehiago lortzeko edo izena emateko, interesdunek Amurrio Bidean-era jo dezakete. Tel.: 945891721 edo posta elektronikoa: autoempleo@amurriobidean.org

Las personas interesadas pueden ampliar información o inscribirse en Amurrio Bidean. Tel. 945891721 o mail. autoempleo@amurriobidean.org.

cartel_networking_EU

Inkestak egingo zaizkie 55 urtetik gorako pertsonei, etengabe ikasteko prozesuan zein oztopo dituzten jakiteko.

Amurrio Bidean 55 urtetik gorakoei inkestak egiten ari da martxoan, bizitza osoan etengabe ikasteko prozesuan zein oztopo dituzten jakiteko. Helburua da egindako ekarpenak kontuan hartuta oztopo horiek gainditzeko ekintzak diseinatzea eta dinamizatzea, pertsona horiek “zahartze konstruktiboa” izan dezaten.

Asmoa da kolektibo horrek egin ohi dituen jarduerez gain (fisikoak, kulturalak…) irakaskuntza- eta ikaskuntza-prozesuak ere justifikatzea. Zahartze konstruktiboren bitartez, egiten diren gauzak sentitu, pentsatu egiten dira eta gauza horiei zentzua ematen zaie; izan ere, ikaskuntzari esker, beste edonola ezarri ezin daitezkeen lotura kognitiboak ezartzen dira.

Maiatzean, inkesten emaitzak aztertu ondoren, zahartze konstruktiboa lantzeko gune pilotu bat ezarriko da, pertsona horien ezagutza, hezkuntza eta prestakuntza sustatzeko.

Gainera, proiektu honetan esku hartuko du Unai Arrieta psikologoak eta bizitza osasungarrian eta zahartze aktiboan adituak.

Parte hartzera animatuko zara?

Martxoaren 31ra bitarte, inkesta hartu eta honako leku hauetan dauden postontzietan utzi ahal izango da: Amurrio Bideanen bulegoa, Kultur Etxea, Liburutegia, Bañueta Kiroldegia eta Nagusien Etxea.

Inkesta betetzen duten pertsonen artean 80 euroko bonu bat zozkatuko da apirilaren 5ean, Myos Terapia Integral-en trukatzeko (fisioterapia, hipopresiboak…). Inkesta Amurrio Bideanen webgunean ere bete daiteke: www.amurriobidean.org.

Ikerketa hau BOZI Amurrion (Bizi Osoan Zeharreko Ikaskuntza Amurrion) proiektuaren barruan egin da, eta proiektua Eusko Jaurlaritzako Hezkuntza Sailak eman dio Amurrio Bideani, bizitza osoan ikasteko programaren bitartez.

Inkesta