Ris 3 Espezializazio Adimentsuko Estrategia Amurriora iritsi da Innobasque-ren eskutik

/in /by

Energiaren gaiari buruzko jardunaldia egingo da abenduaren 12an

Ris 3 delakoa edo Espezializazio Adimentsuko Estrategia Amurriora iritsi da Innobasque-ren eskutik. Zaraobe Institutuak eskualdeko enpresei eta ekoizpen-sektoreetako beste eragile batzuei zuzendutako jardunaldi bat antolatu du, Innobasque berrikuntzarako agentziaren deialdiari erantzuna emateko. Abenduaren 12an egingo da, ReforAmurrio Enpresaldean, 12:30ean. Energiaren gaia aukeratu da jardunaldi horretarako, eta Laudioalde Lanbide Eskola eta Amurrio Bidean ere lankidetzan aritu dira antolamenduan.

Topaketa horretan, energiaren auziari lau ikuspegitatik heltzen dioten lau hitzaldi entzun ahal izango dira. Innobasqueko energiaren pilotajeko taldeko arduradun batek azalpenak emango ditu, alor horretan ekimen berritzaileak egiteko esparru orokorrari eta finantza-tresnei buruz. Jarraian, Amurrioko Udalak Amurrioko enpresa-eremuetako «Trantsizio energetikoa» ekimena aurkeztuko du. Bestalde, Zaraobe Institutuak Haizerrota proiektuaren funtsezko ideiak azalduko ditu. Azkenik, ekimen arrakastatsu bat ezagutzera emango da; kasu honetan, Baiwind enpresarena, autokontsumorako energia sortzearen alorrekoa. Eskualdeko enpresa eta erakundeak gonbidatuko dira jardunaldira.

Azaroaren 16ra arte irekita egongo da Aiara eta Amurrioko Erakusleihoen IV. Lehiaketan izena emateko epea

/in /by

Erakusleihoak abenduaren 9tik 20ra bitartean egongo dira ikusgai

AEKOk (Aiaraldeko Enpreseen Koordinaziorako Federazioa), Aiarako Kuadrillaren babesarekin, Eskualdeko Erakusleihoen IV. Lehiaketa deitu du Aiaran; aldi berean, Apymca-k (Amurrioko Merkatari Ertain eta Txikien Elkartea), Erakusleihoen IV. Lehiaketa antolatu du Amurrion, 2017ko Gabonetako Kanpainaren baitan. Aiarako lehiaketan parte hartu ahalko du Aiarako Kuadrillan merkataritza-, ostalaritza- edo zerbitzu-establezimendu bat eta erakusleiho bat duen edonork, betiere, balorazio tekniko bat egin ahal bada (barruan edo kanpoan). Amurriko lehiaketan parte hartzeko, establezimendua Amurrion egon beharko da. Izena emateko epea irekita egongo da azaroaren 16ra arte, eta Apymcaren egoitzan (Kultur Etxea), 945891200 edo 670497108 telefono-zenbakietara deituta, edo apymca@gmail.com helbide elektronikora idatziz egin daiteke. Aiarako izen-ematea doakoa da; Amurrion, aldiz, doakoa da Apymca-ko kideentzat, eta kide ez direnek 40 € ordaindu beharko dituzte.

Gai librea

Bi lehiaketetako gaia librea da, normalean establezimenduan saltzen diren artikulu eta produktuak agertzen diren bitartean. Erakusleihoak abenduaren 9tik 20ra bitartean egongo dira ikusgai. Antolatzaileek Gabonetan ekimen tradizional honetan parte hartzeko gonbita luzatu diete herritarrei.

APYMCAk berritu egin du “Amurrio Txartela”, elkartearen merkataritza-txartela

/in /by

Merkataritza-jarduera Amurrioko BPGd-ren % 11 da. Izan ere, “toki-merkataritza gure bizitza sozial ereduaren oinarrizko euskarria da, bai eta eragile ordezkaezina ere; gizarte-ekonomia sustatzen du, harreman sozialak bultzatzen ditu, eta herriko bizimodua sustatzen du” adierazi du Jon Aspuru Amurrioko Merkatarien Elkartearen presidenteak.

Amurrioko Merkatari Ertain eta Txikien Elkarteak (APYMCA) aukera baliatu nahi du gure herriko enpresa txiki eta ertainek duten garrantziaz kontzientziatzeko; kasu honetan, bereziki Amurrioko merkataritzak duen garrantziaz, zalantza barik tokiko ekonomiaren arteria bat baita.

Denda txikiak desabantaila-egoeran daude herritarren erosketa- eta kontsumo-ohiturei eragiten dieten beste merkataritza-formula batzuen aldean; horrexegatik, APYMCAk tokiko kontsumoaren balio erantsia azpimarratu nahi du, hainbat erremintaren bitartez, hala nola, AMT.

Elkartea hobekuntza-prozesuan murgilduta dago; hala, eta Amurrioko Udalarekin elkarlanean, txartel horri beste funtzionalitate batzuk eman nahi izan dizkio; esaterako, udal-zerbitzu hauek erabiltzeko aukera: liburutegia eta, etorkizunean, kiroldegia. Txartelaren bidez, halaber, Udalarekin lotuta eta helbideratu gabe dauden ordainketak egin ahal izango dira.

“Aurkezten ari garen proposamen honek, Amurrio Txartelak, gertueneko errealitatearekin lotzen gaitu. Amurriorako berariazkoa da, eta herriko zerbitzu publikoekin lotuta dago; hau da, merkataritzaz haragoko gestioak errazten ditu” zehaztu du Josune Irabien Amurrioko alkateak.

APYMCAren merkataritza-erreminta honek irudi berria dakar, amurrioarrek beren herriarekin bat egin dezaten.

Haren merkaturatzea ospatzeko, ondoko promozioak egingo dira:

  • Azaroaren bigarren hamabostaldian, 5, 10 eta 50 euroko hobariak zozkatuko dira, eta automatikoki sartuko dira txarteletan.
  • Abenduan, aisialdi-sortak zozkatuko dira: “ongizatezko 3 egun” gozatzeko 11 VIP kutxa.
  • Gainera, hurrengo erosketetarako deskontuak pilatzen jarraituko dira.

Azaroaren 5ean, beste urte batez, Mikoturismo Eguna egingo dugu Amurrion, besteak beste pilotalekuko perretxiko-erakusketa tradizionalarekin

/in /by

Aurtengo udazkenean ere, 2017ko Mikoturismo Egunak antolatuko ditugu Amurrion, hamalaugarren aldiz, urriaren 21, 22, 28 eta 29an eta azaroaren 4 eta 5ean. Egun horietan, perretxikoek toki berezia izango dute menu gastronomikoetan, pintxo-lehiaketak eta hitzaldiak egingo dira, eta Arriola Elkarte Mikologikoak, ohi bezala, perretxikoak sailkatu eta haiekin erakusketa bat antolatuko du.

XIV. MIKOTURISMO EGUNAK 2017

URRIAREN 21, 22, 28 eta 29an ETA AZAROAREN 4 eta 5ean: Perretxikoekin egindako Pintxoen XII. Lehiaketa

Dastatzea taberna hauetan: Akeita, Atxubi, El Crucero, Kili Berria, El Rinconcito, La Bodeguilla, La Reunión, La Terraza, Guk eta Txoko Gorri.

Tabernentzako saria:

  • Pintxorik onena, epaimahaiak bozkatuta: 200 € eta plaka.
  • Pintxorik onena, herritarrek bozkatuta: 150 € eta plaka.

2017ko pintxorik onena aukeratzeko botoa eman nahi duten herritarrek gutxienez 6 pintxo dastatu beharko dituzte.Bozketan parte hartzen dutenen artean 250 €-ko bi sari zozketatuko dira, eta Apymca elkartera atxikitako establezimenduetan gastatu ahal izango dituzte.

URRIAREN 21, 22, 28 eta 29an ETA AZAROAREN 4 eta 5ean:Menu gastronomikoak

Sasoiko perretxikoekin eginiko menu gastronomikoak, jatetxe hauen eskutik: Abiaga (28 € + % 10eko BEZa, edaririk gabe), Bideko (43,00 € + % 10eko BEZa).

AZAROAREN 4an, LARUNBATA:Perretxikoak sailkatzea

18:00etatik 20:00etara, perretxikoak sailkatuko dira udal-pilotalekuan, Arriola Elkarte Mikologikoaren eta Alberto Villanueva mikologoaren eskutik. Sailkapenean edonork parte har dezake. Interesdun oro ikusle gisa joan daiteke, zalantzak kontsultatu eta bildutako espezieak eraman, sailkatzeko.

AZAROAREN 5ean, IGANDEA:

Mikoturismo Egunak ekimenaren amaierak bat egingo du Mendiko Lagunak elkarteak urtero antolatzen duen “Garobel” ibilaldiarekin.

  • 10:00etatik 14:00etara: Artisau-produktuen azoka eta salmenta (Larrinaga kalea).
  • 11:00-14:00: Perretxikoen erakusketa udal-pilotalekuan, Arriola Elkarte Mikologikoaren eskutik.
  • 13:30ean: Epaimahaiak saria emango dio Perretxikoekin egindako Pintxoen XII. Lehiaketa irabazten duen tabernari.

AMURRIO BIDEANEN INSTAGRAM-A

Amurrio Bideanen Instagram kontuan “Cofre Vip” kaxa bat zozkatuko da, Araba bidaia-agentziaren eskutik, Mikoturismo Egunak 2017 ekimenarekin lotutako landa-bidaia bat egiteko.

* ARRIOLA ELKARTE MIKOLOGIKOAK ZALANTZAK ARGITU ETA PERRETXIKOAK SAILKATZEN LAGUNTZEN DIE HALA NAHI DUTENEI: urteroko legez, perretxikoen goreneko denboraldia iritsi dela eta, Amurrioko Arriola Elkarte Mikologikoa prest dago amurrioarrei zalantzak argitzeko edo aleak identifikatzen laguntzeko. Elkarte horretako kideek Amurrioko Kultur Etxean duten egoitzan eskaintzen diete laguntza herritarrei, izan ditzaketen zalantzei erantzunez, urritik abendura bitarteko astearte guztietan, 18:30etik 19:30era bitartean.

Berrikuntzari eta proiektuen kudeaketari buruzko ikastaro bat emango da, enpresen eskaerari erantzunez.

/in /by

Amurrio Bidean-ek Berrikuntzari eta proiektuen kudeaketari buruzko 35 orduko ikastaro bat emango du azaroaren 9tik 30era

Berrikuntza ezinbestekoa da enpresentzat, merkatuan jarraitu ahal izateko. Bezeroak, haien beharrak eta eskakizunak aldatu egiten dira eta, beraz, haientzat sortzen diren produktu eta zerbitzuek ere aldatu egin behar dute.

Enpresek badakite hori dela errealitatea, baina eguneroko kontuak eta baliabide falta direla eta, askotan alde batera uzten dute enpresetan berrikuntza-prozesuak ezartzea, eta beste gauza batzuei ematen diete lehentasuna. Hori akatsa da, noski.

Enpresak aurrea egin dezan eta arrakasta izan dezan, ezinbestekoa da berrikuntza sistematizatzeko tresnak erabiltzen ikastea, agenda bat sortzea eta hori guztia antolakuntzaren egunerokoan barneratzea. Horrez gain, lagungarria da SCRUM tresna ezagutzea, hau da, proiektuak kudeatzeko metodo arina, hautemandako berrikuntzak ezartzeko. Hori dela eta, prestakuntza-ekintza hau egingo da ReforAmurrio Enpresaldean astelehen, astearte eta ostegunetan, 17:00etatik 20:30era.

Azaroaren 6tik 27ra ordenagailuak instalatzeko, mantentzeko eta konpontzeko ikastaroa egingo da

Hardware mihiztaketa, software kontuak eta sareen instalazioaren oinarriak ikastea modu ona da informatikaren munduan sartzen hasteko. Aurretik informatikari buruzko ezagutzarik ez duten eta mundu horrekiko interesa duten pertsonentzat da. Prestakuntza hau egin ondoren, parte-hartzaileak gai izango dira ordenagailuak instalatzeko, sare txikiak muntatzeko eta makinetan konponketa txikiak egiteko. 78 orduko ikastaroa da, eta astelehenetik ostiralera emango da, 09:30etik 13:30era.

Informazio gehiago jasotzeko eta izena emateko, jarri harremanetan Amurrio Bidean-ekin, 945891721 telefono-zenbakira deituta edo empresa@amurriobidean.org helbidera idatzita.

Enplegua bilatzeko motibazio-pilulak

/in /by

Jarduera hau, Amurrioko Udalaren Gazte Enplegu Planak diruz lagundua, ReforAmuriro Enpresaldean egingo da lau asteazkenetan, 18:00etatik 20:00etara

Lau saio gidatu egingo dira: lau coachek, saiootan, enplegu-bilaketaren prozesuari ekiteko eta prozesu hori sormenez gauzatu eta nahi den enplegua lortzeko baliabide oso erabilgarriak azalduko dituzte.

Jorge Ortiz de Urtaranek piluletako lehenengoa gidatuko du, urriaren 18an: “¿Y ahora por qué no? Si trabajamos un tercio de nuestro día… Mejor hacerlo en algo que realmente nos guste” (Eta orain zergatik ez? Gure egunaren herena lanean igarotzen badugu… Hobe benetan gustatzen zaigun zerbaitetan jardun).

Bigarren saioa, urriaren 25ean, Sergio Ezpeleta kirol arloko coachak gidatuko du, eta emozioak kudeatzen ikasteko dinamikak eta tresnak landuko ditu. Haren beraren hitzetan: “Zeu zara zure bizitzan agintzen duen bakarra; erabaki nor izan nahi duzun”.

Hirugarren saioan, azaroaren 8an, Atlantako 96ko Jokoetan urrea eraman zuen gimnasta olinpiko bat arituko da hizlari: Estibaliz Martinez. Urrea lortu ostean, kirol-ibilbidea utzi behar izan zuen lesio baten ondorioz. Martinezek, bere esperientzian oinarrituta, bizitzaren aldaketetara optimismoz eta jarrera onez moldatzearen garrantzia azalduko du.

Azkenik, Aitor Carmonak, azaroaren 15ean, “Tu actitud cuenta más que tu currículo” (Zure jarrera zure curriculuma baino garrantzitsuagoa da) izeneko saioan, lan-merkatura arrakastaz sartzeko eskuragarri ditugun baliabideak deskubrituko dizkigu.

Saio hauen guztien helburua da parte-hartzaileak ahalduntzea eta nahi dugun lana lortzeko eskura ditugun askotariko tresna baliotsuak erakustea. Izan ere, ahal dela sinestea, ahal izateko lehen urratsa da.

Saio hauek enplegu bila dabiltzan edo lan-munduaren aldaketei aurre egiteko motibazioa lortu nahi duten pertsonentzat antolatu dira; bereziki, kalitatezko lehen enpleguaren bila dabiltzan gazte amurrioarrentzat.

Informazio gehiago jasotzeko eta izena emateko, jarri harremanetan Amurrio Bidean-ekin, 945891721 telefono-zenbakira deituta edo empresa@amurriobidean.org helbidera idatzita.

CARTEL PILDORAS EUSKERA

Amurrioko Udalak 2017rako laguntzen deialdi bat onartu du gure udalerrian enpresa txikiak ezartzeko

/in /by

Eskaerak aurkezteko epea azaroaren 20an amaituko da eta diru-laguntzaren gehienezko zenbatekoa 2.000 eurokoa izango da ekimen ekintzaile bakoitzeko.

Amurrion enpresa txikiak ezartzeko laguntzak eskatzeko epea ireki da. 20.000,00 euroko udal-partida bat bideratu da, ordenantzan jasotako betekizunak betetzen dituzten eta eskaera ezarritako epeetan aurkezten duten onuradunen artean banatzeko. Gehienez ere, 2.000,00 € euroko diru-laguntza eskuratu ahal izango da, baina zenbateko txikiagoa ere eskuratu daiteke; izan ere, 20.000,00 euroak eskatutako betekizunak betetzen dituzten ekimen edo enpresen artean hainbanatuko dira.

Onuradunek Amurrion erroldatuta egon beharko dute duela bi urtetik gutxienez eta Amurrion enpresa-ekimen bat abian jarrita izan beharko dute 2016ko azaroaren 21aren eta 2017ko azaroaren 20aren artean, deialdian adierazitako beste betebehar batzuen artean.

Diru-laguntzaren onuradunek izan dituzten gastuak justifikatu beharko dituzte; horretarako, jatorrizko fakturak eta horien ordainagiriak aurkeztu beharko dituzte. Gastu hauek lagundu ahal izango dira diruz: enpresa eratzearen eta abian jartzearen ondoriozko gastuak, lokala alokatzeko gastuak, jarduera garatzeko eginiko marketin- eta inbertsio-gastuak eta antzeko beste gastu batzuk.

Informazio gehiago eskuratzeko, Udalaren webgunea (www.amurrio.org) kontsulta daiteke, edo Amurrio Bideanekin harremanetan jarri (telefono zk.: 945891721; helbide elektronikoa: autoempleo@amurriobidean.org).

Dirulaguntzaren_Laburpena_2017

ANEXO1_eu

ANEXO2_Hirugarren_Interesatua

Amurrioko Udaleko Gazte Planak bekak eskaintzen ditu HAZILAN prestakuntzako parte-hartzaileentzat

/in /by

HAZILAN programaren helburua da Amurrioko gazte kualifikatuek lan-esperientzia lortzea eta, hala, kalitatezko enplegua lortzea, jaso duten prestakuntzari dagokien eta lan egin nahi duten sektorean.

HAZILANeko parte-hartzaileek 20-44 urte bitarte izan behar dituzte, bai eta goi-mailako heziketa-zikloko, diplomaturako, lizentziaturako edo graduko ikasketak ere. Lanik gabe egon beharko dute, edo astean 20 ordutik beherako lan-kontratu batekin. Lehentasuna izango dute Amurrion erroldatutako pertsonek. Beka lortzeko, ezinbestekoa da HAZILANen parte hartu izana, Amurrion erroldatuta egotea eta dagokion eskaera egitea. Udalak 12 beka ditu parte-hartzaileei praktikaldian edo proiektua garatzean ordaintzeko. Horrela, sari ekonomikoa jasoko dute eginiko lanaren truke.

HAZILAN programan izena emateko epea irailaren 18an hasiko da.

 Aurkezpen-jardunaldia

Urriaren 2an, 10:00etan, aurkezteko jardunaldi bat egingo da, ReforAmurrio Enpresaldean, programaren xehetasunak eta jarduera hori eskaini eta kudeatuko duten pertsona guztiak ezagutarazteko. Gainera, zalantzak argitzeko aukera ere izango da. Saio horretan parte hartzeko, izena ematea komeni da.

Eskuragarri dauden azken datuen arabera, 2017ko uztailean 719 pertsona arituko dira Amurrion aktiboki lan bila. Horrek esan nahi du langabezia-tasa % 14,4 dela. 719 pertsona horietatik 350 gazteak dira, 20-44 urtekoak. Gainera, ikasketa-mailari erreparatuz gero, 100 gazte inguru oso kualifikatuta daude. HAZILANen helburua da pertsona horien enplegagarritasuna eta lehiakortasuna hobetzea, kalitateko enpleguak bilatzen lagunduz eta horien kualifikazioak udalerrian edo eskualdean eragina izan dezan bultzatuz.

HAZILAN programa bigarrenez garatuko da Amurrion. Lehenengo edizioan 9 pertsonak parte hartu zuten, eta 2 proiektu garatu zituzten bertako enpresatarako. Balorazio oso positiboa izan zuten, 10 puntutik 9 puntukoa.

Kasu honetan, HAZILAN programak prestakuntza hauek eskainiko ditu: “Teknologia berriak eta marketin digitala”, enpresek langileengan eskatzen dituzten lan-trebetasunak lantzeko taldeko coaching-a eta enpresetako praktikak, edo negozio-ideia baten bideragarritasun-proiektuen garapena. Aurten, berritasun gisa, Amurrioko Udaleko Gazte Planaren babesarekin, prestakuntzan parte hartuko duten gazteek 600-850 euro arteko beka bat eskatu ahal izango dute hilean (onetsitako oinarrien arabera), praktikek edo proiektuen garapenak iraungo duten 4 hilabeteetarako.

“Teknologia berriak eta marketin digitala” zeharkako prestakuntza da, parte-hartzaile bakoitzaren kualifikazio teknikoa osatzeko sortutakoa. Helburua da metodologia eta aplikazio informatikoei buruzko ezagutzak eskuratzea, bai langileei, bai enpresei eraginkorragoak izaten laguntzeko. Halaber, marketineko joera berriei buruzko ezagutzak ere eskuratuko dira, Internetek jarduera-arlo horretan eskaintzen dituen aukerak direla-eta.

Praktikak egingo diren enpresak ez dira bertakoak izango soil-soilik, eta parte-hartzaile bakoitzaren intereseko sektorearekin lotuta egongo dira.

Bertako enpresentzako deialdia

Enpresek kualifikatuta eta inplikatuta eta behar bezala motibatuta dauden pertsonen lantaldeak izan behar dituzte; horregatik, gazteak aukeratzea funtsezko oinarria da enpresan, eta HAZILAN programaren bitartez egiteak, gainera, arrakasta-berme handiagoa eskaintzen du. Langile kualifikatuen premia bereziak izanez gero edo spin off bihur daitekeen negozio-ildo berri bat garatzeko asmoa izanez gero, jarri, mesedez, harremanetan agentziarekin.

Eusko Jaurlaritzak diruz laguntzen du jarduera hau eta POPV FSE 2014-2020 HAZILANen esparruan garatzen da, % 50ean Europako Gizarte Funtsak kofinantzatuta, eta Garapen (Garapen Agentzien Euskal Elkartea) erakundeak koordinatuta.

Informazio gehiago eta izen emateak: Amurrio Bidean-en, 945891721 telefono-zenbakian, edo empresa@amurriobidean.org helbide elektronikoan.

 

Amurrioko Udalak eta Amurrio Bidean sozietateak GAZTE ENPLEGU PLANA abiarazi dute: praktika ordainduak enpresetan eta beste prestakuntza-ekintza batzuk

/in , , , , , , , , , /by

Amurrioko Udalak, Ekonomi Sustapen eta Enplegu Sailaren bitartez eta Amurrio Bidean sozietate publikoarekin batera, GAZTE ENPLEGU PLANA proiektua taxutu du. Proiektu horrek, hiru garapen-ildo dauzka eta 20 eta 44 urte arteko gazteentzat antolatu da.

“Udalean bildutakook, lehenengo lan-esperientzia eskuratzea zaila denez ikusita, apustu handia egin dugu herriko gazteen beharrak betetzeko. Hori dela eta, gure ustez, ekimen hori aukera paregabea da gazte amurriarrentzat, prestakuntzaren gaineko ekimena ez ezik lanbide-bizipena ere delako”, azaldu du Gazteria zinegotzi Miren Saratxagak.

Amurrioko Planaren lehenengo jarduera hau da: Hazilan programan parte hartuko duten gazteek praktikaldian edo proiektuaren barruan negozio-ideiaren bat garatzen duten bitartean ordainsaria (hilean, 600 eta 800€ artean, 4  hilabetez) jasoko dute. Hamabi gaztek jasoko dute ordainsaria.

Bigarren jarduerak –besteak beste, zeharkako gaitasunak eta gizarte- nahiz komunikazio-gaitasunak eskuratzean datzana– hauxe proposatzen du: eragin handiko motibatzeko lau pilula egitea, coach aditu batzuen eskutik, urriaren 18an eta 25ean eta azaroaren 8an eta 15ean (asteazkenak guztiak). Saioak arratsaldeko seietan izango dira, El Refor instalazioetan.

Tania Lamarca, gimnasia erritmikoko gimnasta ohia –urrezko domina olinpikoa duena– izango da jardunaldiaren txostengileetako bat. Saio horiek, gazteak, bizitza pertsonalean nahiz profesionalean lortu nahi dutena lortzera bultzatu nahi dituzte.

Hirugarren ekintza ekintzailetza proiektuen bizkortzailea martxan jartzea da: negozio-ideiaren bat dutenei eta ekintzaile izateko gaitasuna aztertu nahi dutenei laguntza  profesionala eta aditua emango zaie.

Horiek horrela,  hainbat saio antolatu dira negozio-plana taxutzen ikasteko, baita gaikako saioak  eta  burutu nahi diren ideiei dagozkien sektoreekin loturiko martxan badauden ekimenak bisitatzeko aukera ere. Halaber, laguntza pertsonalizatua emango da, profesional adituen eskutik, negozio-ideia garatzen den bitartean.

Gazte Enplegu Plana Amurrio Bidean Amurrioko Udaleko tokiko garapen-agentziak kudeatuko du. Interesdunek jo hona planari buruz gehiago jakiteko edo izena emateko:945891721 telefonoa edo empresa@amurriobidean.org helbide elektronikoa.

 Triptico Web Plan de Empleo Joven

Artzain Egunaren hogeita laugarren edizioa ospatuko da aurten Amurrion

/in /by

Irailaren 17an izango da

Irailaren 17an, Artzain Egunaren XXIV. edizioa ospatuko da Amurrion. Artzaintzaren inguruko jaiegun hori guztiz errotua dago Amurrioko jaien egutegian. Antolatuko diren askotariko jardueren bitartez, ardi latxaren abeltzaintza eta produktuak herritarrei hurbiltzea izango da xedea. Ospakizunak goizeko 10:00etan hasiko dira, ardi-aziendaren txapelketa eta artzain-gazten lehiaketarekin; eta arratsaldean, udal-igerilekuen alboan, artzain-txakurren lehiaketa egingo da.

Eguitaraua

10:00etatik 14:30era Frontoi kalean:

LATXA ARRAZAKO ARDIEN PROBINTZIARTEKO XXIV. LEHIAKETA

IDIAZABAL JATORRI DEITURAKO ARDI GAZTAREN XI. TXAPELKETA, Ruperto Casanueva memoriala.

Jarduera hauek egingo dira:

  • Gazten eta txakolinaren erakusketa eta salmenta. Juan Urrutia plaza.
  • Gazta-dastaketa. Dastatu 2 gazta euro baten truke. Juan Urrutia plaza. (Elkarteak antolatuta)
  • Baserriko produktuen erakusketa eta salmenta. San Anton plaza.
  • Nekazaritzako makineriaren erakusketa. Larrinaga kalea.
  • Artisautza-produktuen erakusketa. San Anton plaza.
  • Gastronomia-erakusketa. Juan Urrutia plaza.
  • Argazki- eta etnografia-erakusketa. Guk pasealekua.
  • Amurrioko txistuzaleak.
  • Urduñako Santa Cecilia Musika Banda.

10:00etatik 13:00etara  GAZTAREN V. HERRI LEHIAKETA Juan Urrutia plazan.

11:30ean Artzain omenduen ongietorria. Juan Urrutia plazan.

12:00etatik 12:30era Erakustaldia: gazta egitea. Juan Urrutia plazan.

12:30etik 13:30era Ilea mozteko bi teknikaren erakustaldia: tradizionala eta Zeelanda Berrikoa. Udal-pilotalekuaren sarreran.

12:30etik 13:00etara Ardi latxaren produktu berrien dastaketa:Ardiki eta Gaztazaharra. Juan Urrutia plazan.

13:30ean Arabako artzainen omenaldia. Juan Urrutia plazan.

13:30ean Sari-banaketa. Juan Urrutia plazan.

13:30ean Ardi-jana eta -dastatzea Juan Urrutia plazan. Erretilua 1 euro.

18:00etan ARTZAIN TXAKURREN XVIV. LEHIAKETA, JustoFurundarena memoriala. Pikazako zelaiaren parean, udal-igerilekuen ondoan.

Herritar guztiei dei egiten zaie jantzi tradizionalez jantzita etor daitezen; parte-hartzaile guztien artean baserriko produktu-sortak zozkatuko dira.