Okupatu tailerraren edizio berria, lana bilatzeko gaitasunak hobetzeko.
VITAL Fundazioak, Aiarako Kuadrillaren bitartez, maiatzaren 15etik 18ra Reforamurrio Enpresaldean egingo den tailer hau diruz lagunduko du.
Aurreko edizioetan lortutako emaitza onak direla eta, Okupatu tailerraren beste edizio bat egitea erabaki da, lana bilatzen lagun dezaketen gaitasunak eta trebetasunak lantze aldera.
Gero eta ohikoagoa da gure bizitza profesionalean lana bilatzeko prozesuari aurre egin behar izatea, nola pertsona langabezian dagoelako, hala lehen lanpostuaren bila ari delako edo lan hobe baten bila ari delako. Baina, nola bilatu lana? Okupatu tailerrean, parte hartzen duten pertsonek hainbat tresna jasoko dituzte; hala, nork bere burua ezagutuz eta bakoitzaren indarguneak eta ahulguneak aztertuz, beren buruari helburuak jarri ahalko dizkiote eta lan-bilaketa hobeto planifikatu eta gauzatu ahalko dute, ibilbide pertsonalizatu bati jarraituz, arrakasta izateko ahalik eta aukera gehien izan ditzaten. Helburua da bilaketa-prozesua ahalik eta gehien zehaztea pertsona bakoitzaren profila eta beharrak aintzat hartuta, bilaketa eraginkorragoa izan dadin.
Enplegu bakoitzerako ezagutza eta gaitasun jakin batzuk eskatzen dira, eta horiek prestakuntza eta esperientziaren bitartez lor daitezke. Alabaina, enpresek gero eta garrantzi handiagoa ematen diete hautagaien zeharkako gaitasunei; esaterako, nork bere burua ondo ezagutzeari, nork bere burua motibatzeko gaitasunari, erantzukizunari, espektatiben kudeaketari, aldaketen aurrean zer egin jakiteko gaitasunari, erabakiak hartzeko gaitasunari… Besteak beste, gaitasun horiek landuko dira tailerraren lehen hiru saioetan. Azken saioan lan-elkarrizketa bati buruzko dinamika bat egingo da; bertan, parte-hartzaile bakoitzak gomendioak eta aholku praktikoak jasoko ditu, fase horri segurtasun eta konfiantza handiagoz aurre egin ahal izateko.
Tailerra 9:00etatik 13:00etara izango da, eta plaza kopurua mugatua da. Lehentasuna emango zaie langabezian daudenei eta Amurrion edo Aiaraldean bizi direnei.
Tailerrean izena emateko edo informazio gehiago jasotzeko, jarri harremanetan Amurrio Bideanekin, 945891721 telefono-zenbakira deituta edo administracion@amurriobidean.org helbidera idatzita.
